AS XUVENTUDES SOCIALISTAS DE FERROL RECLAMAN ANTE A XUNTA QUE SE ESCOITE Á MOCIDADE FERROLANA.

Participaron nunha reunión o pasado martes 7 de abril, que contou con escasa participación de entidades mozas.

Os mozos e mozas socialistas reclaman unha vez máis a posta en marcha do Consello da Mocidade de Ferrol co fin de apostar pola participación dos mozos e mozas ferroláns.

Os mozos socialistas de Ferrol participaron onte nunha reunión promovida pola Dirección Xeral de Xuventude e Voluntariado da Xunta de Galicia onde se presentou o Programa “Iniciativa Xove”.

Dende Xuventudes Socialistas de Ferrol critican a paralización dos órganos de participación da mocidade e reclaman que se confíe e escoite á mocidade da nosa cidade.   Para a Secretaria Xeral das XSG de Ferrol esta é a proba de que o PP no cree na participación da xente moza.

Para as Xuventudes Socialistas de Ferrol  non é lóxico gastar os cartos en “paripés” que tratan de maquillar a inexistencia de políticas de mocidade da Xunta.

A non aposta por estes órganos provoca a falta de comunicación activa e de coñecemento da administración dos mozos e mozas asociados, coa conseguinte falta de participación de entidades neste tipo de reunións (apenas catro asociacións participaron, sendo unicamente XSG unha organización moza propiamente dita).

Para as XSG de Ferrol é labor da administración fomentar os mecanismos para que a voz dos mozos e mozas sexa escoitada e dinamizar non só mediante paquetes de axudas económicas para proxectos puntuais, senón mediante a creación dos órganos de participación e da potenciación do asociacionismo.

Dende a agrupación socialista animan ao goberno local a fomentar o asociacionismo e a confiar nos mozos e mozas de Ferrol. Reclaman que dunha vez por todas se lles dea voz mediante os órganos de participación xa que a mocidade merece ser escoitada.

AS XUVENTUDES SOCIALISTAS DE FERROL LOITAN CONTRA A REFORMA DO ARTIGO 13.4 DA LEI DA INTERRUPCIÓN VOLUNTARIA DO EMBARAZO BAIXO O LEMA “QUE NON NOS TOQUEN A LEI”

Os mozos e mozas socialistas saíron á rúa na mañá de hoxe co fin de dar a coñecer en qué consiste a reforma do artigo 13.4 da leu de saúde sexual e reprodutiva e da interrupción voluntaria do embarazo. Repartiron dípticos informativos e preservativos a mozos e mozas ferroláns.

As Xuventudes Socialistas denuncian a manipulación informativa do PP, que escúdase en que está evitando que menores interrompen o seu embarazo sen coñecemento paterno, sen explicar que este caso é só unha excepción cando mozas menores de idade teñen algún conflito grave, coma violencia familiar: “O Partido Popular fai un alegado demagóxico en defensa da vida e está deixando sen protección precisamente as menores que máis a necesitan”.

Recordan que “a Lei, impulsada por un goberno socialista, di que as mulleres mozas deben informar aos seus pais ou titores coa excepcionalidade de que haxa un conflito grave no ámbito familiar”, e lembra que “o 90% das mozas que toman esta decisión fano co coñecemento dos seus proxenitores”.

“Dende as XSG de Ferrol queremos facer unha defensa desta lei impulsada polo goberno socialista, que non só protexía as mulleres máis vulnerables senón que fai principal fincapé na importancia da educación sexual” puntualizou a secretaria xeral de Ferrol, Ana Lamas, que engadiu “O Partido Popular non tivo valor de facer a reforma na que de verdade cree e agora con este cambio quere contentar aos sectores máis retrógrados con fins electoralistas, e o fai a costa de mozas con conflitos graves ou en situación de desamparo”.

“As mulleres mozas non son nin terroristas nin incultas como quere facer ver o Goberno do Partido Popular; son mulleres libres, e como tal deben ter dereito a decidir sobre o seu corpo” –reiteran os mozos e mozas socialistas- “A Lei recoñece o dereito á maternidade libremente decidida, o que implica non só recoñecer ás mulleres a capacidade de decisión sobre o seu embarazo, senón tamén que esa decisión, consciente e responsable sexa respetada”.

AS XUVENTUDES SOCIALISTAS DE FERROL BUSCAN SOLUCIÓNS Á ALTA TAXA DE DESEMPREGO DA CIDADE NUNHA REUNIÓN DE TRABALLO ABERTA

Terá lugar mañá venres, 16 de xaneiro, ás 19:30h na Galería Sargadelos.

Os mozos socialistas buscan así que dende diferentes experiencias, se ofrezan diferentes visións, definindo grazas a elas propostas para mellorar a situación de actual desemprego e que sirvan de ideas á hora de definir o programa electoral mozo.

A reunión será moderada por  Ana Lamas Villar, Secretaria Xeral das Xuventudes Socialistas de Ferrol, que neste sentido expresou que dende a organización “queremos traballar na elaboración de ideas e de propostas para que o futuro da nosa mocidade estea aquí e non no exilio” .

Así mesmo as XSG manifestan que “vemos como moitos amigos e coñecidos teñen que buscarse a vida, o presente e o futuro fóra, nós mesmos sabemos que en calquera intre tal vez teñamos que emigrar tamén. Pero cremos que Ferrol ten futuro, ten posibilidades e oportunidades, que poden ser creadas e fomentadas. Cremos ademais que politicamente pode traballarse e facer cousas ao respecto. Entendemos que é unha obriga dos representantes municipais buscar solucións e traballar a reo para crear oportunidades, que existen, e apoiar a aqueles que poden facelas realidade.”

Esta é a primeira reunión sectorial de traballo das que teñen programadas os mozos socialistas para próximas datas. Están previstas diferentes reunións de traballo sectoriais, con diferentes colectivos e persoas individuais que estean directamente relacionadas coas temáticas a traballar de cara a elaboración do programa electoral mozo.

Os mozos socialistas preparan unha reunión de traballo, aberta ao público, con empresarios mozos da cidade e con representantes de diferentes colectivos, como o sindicato UXT, e a  Asociación de Jóvenes Empresarios. O obxectivo é elaborar diferentes propostas en materia de emprego.

AS XUVENTUDES SOCIALISTAS CONTRA A “LEI MORDAZA”

“Esta Lei demostra unha forma de gobernar baseada no totalitarismo”

“Os e as xoves socialistas mostranse rotundamente en contra da mal chamada “Lei de Seguridade Cidada” plantexada polo Goberno de Mariano Rajoy e lanzan unha campaña na súa contra baixo o lema #LibertadRobada.”

As Xuventudes Socialistas de Ferrol fixéronse eco da campaña que lanzou a organización; a campaña #LibertadRobada contra a Lei de Seguridade Cidadá.

A mal chamada “Lei de Seguridade Cidadá” é imposta de maneira unilateral polo Goberno do Partido Popular e hoxe se debate no Congreso dos Deputados. As XSG entenden que pretende, a raíz da intensa actividade dos movementos sociais, xerar un medo en quen queira exercer o seu dereito de manifestación e expresión.

Para Ana Lamas, secretaria xeral de Ferrol das XSG, “Se esta Lei chega a aprobarse, os corpos e forzas de seguridade do Estado terán unha gran capacidade de actuación en base a meras sospeitas, provocando a inseguridade na cidadanía”.

En opinión das Xuventudes Socialistas de Ferrol, “atopámonos ante un grave problema de inseguridade xurídica ao descoñecerse en que situacións considérase preciso que os axentes actúen para previr un delito. A suposta tranquilidade no espazo público limita os dereitos fundamentais como o de manifestación, expresión ou reunión cunhas sancións completamente desorbitadas”.

Segundo a opinión da organización política xuvenil “sancionar de maneira exacerbada determinadas mostras de opinión por consideralas un ataque á seguridade colectiva non é unha solución ao problema”.

Os e as socialistas remarcaron que “hoxe debátese no Parlamento de Galicia a instancias dos socialistas cal é a opinión da Xunta de Galicia ao respecto da aprobación que ataca de fronte as liberdades e dereitos fundamentais, aínda que dubidan que o señor Feijoo se desmarque da política represiva do seu compañeiro de partido Mariano Rajoy.

A secretaria xeral concluíu afirmando que “debemos apostar por leis que permitan expresar o pensamento libremente e actuar de maneira independente sen que se considere un ataque a orde pública. O Estado de Dereito, de aprobarse esta Lei, quedará unha vez máis profundamente danado. De novo, o Goberno do Partido Popular demostra que algún sectores deste país non creen la liberdade”.

AS XUVENTUDES SOCIALISTAS DENUNCIAN O PECHE DA CASA DA XUVENTUDE

 “A casa da Xuventude debería de estar traballando máis que nunca, para que Ferrol deixe de ser para os mozos e mozas unha cidade sen oportunidades”

“A única explicación que vemos a semellante disparate é que, como o concello non sabe que facer co edificio do hospicio, pasa para alí a Casa da Xuventude e así faise unhas fotos a concelleira, que parece que é o único que lle importa"

As Xuventudes Socialistas de Ferrol denuncian o peche da casa da Xuventude, trasladando as súas funcións ao edificio do antigo hospicio municipal: “Os mozos e mozas de Ferrol tíñamos unha casa da Xuventude estupenda, un espazo con múltiples aulas independentes e deseñado para este uso e o Concello non se lle ocorre outra cousa que pechala”.

Segundo explicou a secretaria xeral, Ana Lamas, “A única explicación que vemos a semellante disparate é que, como o concello non sabe que facer co edificio do hospicio, pasa para alí a Casa da Xuventude e así faise unhas fotos a concelleira, que parece que é o único que lle importa”.

As XSG de Ferrol xa veñen denunciando a falta de políticas para a mocidade en Ferrol, que adoece de multitude de problemas: “A casa da Xuventude debería de estar traballando máis que nunca, para que Ferrol deixe de ser para os mozos e mozas unha cidade sen oportunidades”.

Para os mozos e mozas socialistas queda de novo de manifesto que o Partido Popular non cree nos servizos públicos: “O PP ten sempre por desgraza unha estratexia moi clara: primeiro baleiran de contido e de actividade os espazos públicos, para logo pechalos ou privatizalos, non é ningún segredo que a dereita non cree nos espazos dos cidadáns”

Recordan que unha vez máis a Concelleira non contou coas asociacións de Ferrol: “de novo quedou de manifesto que ao Goberno preocúpalle ben pouco o asociacionismo e que non creen na participación cidadá”

Para rematar os mozos e mozas socialistas animan ao Goberno local que empece a traballar pola mocidade de Ferrol, e xa bastantes problemas teñen e que deixen de argallar inauguracións de cousas que xa existen”.

AS XUVENTUDES SOCIALISTAS SAEN Á RÚA PARA LOITAR POLA IGUALDADE

“Os homes teñen que implicarse en alcanzar a loita pola igualdade, e en conseguir unha sociedade máis digna, sen discriminacións.”

“Temos que conseguir erradicar dunha vez por todas os estereotipos que catalogan aos homes e ás mulleres en todos os ámbitos da vida”

As Xuventudes Socialistas de Galicia (XSG) sumáronse á campaña de ONU Mulleres #HeForShe, que foi presentada por Emma Watson, o pasado día 20 de setembro.

Segundo explicou a secretaria xeral, Ana Lamas, “Encántanos esta campaña, xa que reivindica o papel dos homes e mozos na consecución dunha igualdade real para conseguir finalmente unha sociedade máis xusta. Para nós- engadiu- unha sociedade máis xusta é aquela que non discrimina a ninguén.”

Continuou argumentando que “os homes teñen que implicarse en alcanzar a loita pola igualdade, e en conseguir unha sociedade máis digna, sen discriminacións.”

As XSG de Ferrol saíron esta mañá de sábado á rúa, co fin de dar a coñecer a campaña á cidadanía. Ademais, elaboraron uns carteis co lema: “Eu son feminista, e ti?” co que fotografaron ós cidadáns que quixeron deixar patente a súa implicación coa igualdade.

Durante a vindeira semana seguirán saíndo á rúa, para dar a coñecer a campaña e fotografar a moitos ferroláns involucrados coa loita pola igualdade: “So coa loita de todos, homes e mulleres, conseguiremos unha sociedade mais xusta e igualitaria”.

Os mozos socialistas concluíron afirmando que “temos que conseguir erradicar dunha vez por todas os estereotipos que catalogan aos homes e ás mulleres en todos os ámbitos da vida”

AS XUVENTUDES SOCIALISTAS SÚMANSE A CELEBRACIÓN DA SEMANA EUROPEA DA MOBILIDADE SOSTIBLE E SUSPENDEN A XESTIÓN DE REY VARELA NESTA MATERIA

“O Plan de mobilidade, está sen desenvolver, cun goberno que non move un dedo polos servizos públicos de transporte”

“Os concellos teñen que traballar na redistribución e no redeseño das rúas e espazos públicos a prol das persoas.”

As Xuventudes Socialistas de Galicia celebrarán a través das redes a Semana Europea da Mobilidade Sostible 2014, que ten lugar estes días, e  que ten obxectivo e loitar contra o cambio climático, fomentar o uso do transporte público e promover o uso de medios de transporte sostibles.

Así mesmo, aproveitan para cualificar como deficiente a xestión de Rey Varela neste sentido: “O Plan de mobilidade, está sen desenvolver, cun goberno que non move un dedo polos servizos públicos de transporte”

As XSG de Ferrol sinalan unha importante falta de infraestruturas e as deficiencias dos escasos carrís bici pola falta de mantemento. Así mesmo denuncian o desmantelamento do servizo de préstamo de bicis, que ten na actualidade moi poucos usuarios.

“Está claro que o goberno local de Rey Varela non cree nun modelo de mobilidade sostible, a xestión dos transportes públicos de Ferrol é lamentable” sinalou a Secretaria Xeral das XSG de Ferrol, Ana Lamas: “Non están facendo ningunha xestión cara a unha mellora de horarios ou de frecuencias, o servizo de trens á Coruña é escaso e lento”

Os mozos e mozas socialistas apostan polo desenrolo do Plan de mobilidade, que permite por unha mobilidade sostible, coa peonalización dos cascos históricos para o goce das persoas e onde o protagonista sexa o peón e non os coches: “os concellos teñen que traballar na redistribución e no redeseño das rúas e espazos públicos a prol das persoas.”

A Semana Europea da Mobilidade culminará coa celebración do Día Mundial do Coche o 22 de setembro. En declaracións da secretaria de medio ambiente e desenvolvemento sostible, Sofía Vázquez, “en España o transporte supón un 25% do total das emisión de carbono emitidas, provocando non só graves problemas medioambientais, senón tamén moitos problemas de saúde para os cidadáns” engadindo que “iniciativas como esta á que nos sumamos dende as XSG pretenden concienciar a xente de que outro tipo de cidades máis agradables e saudables para vivir son posibles.”