DÍA MUNDIAL DA ARQUITECTURA

Con motivo da celebración do Día Mundial da Arquitectura cada unha das delegacións do Colexio Oficial de Arquitectos de Galicia escolle un espazo representativo da súa cidade, este ano baixo o lema da “cidade sostible”. A nosa delegación local elixiu o conxunto de Ferrol Vello.

Ferrol Vello é o barrio que dá orixe á cidade, datando da idade media (século XII), anterior aos estaleiros e o arsenal, dando acollida a unha pequena poboación que se dedicaba á pesca e á salgazón. O tecido corresponde a unha configuración propia da baixa idade media, como vemos na configuración das súas estreitas rúas. Aproximadamente no século XVI e trala súa rápida reconstrución tras un pavoroso incendio constitúense dous tipos de edificación, ben definidos que aínda apreciamos na actualidade: a vivenda mariñeira, dominada pola soleira e a balconada así como a vivenda burguesa que superpón en parte ás anteriores.

Con esta mención o C.O.A.G. lémbranos a necesidade de protexer o noso patrimonio histórico defendendo as medidas de rehabilitación postas xa en marcha.

Esta é unha boa oportunidade para que todos os ferroláns coñezan a súa orixe, o nacemento da súa cidade.

Dende Xuventudes Socialistas de Ferrol queremos facer fincapé na necesidade de concienciación por parte dos cidadáns da necesidade de conservar o noso patrimonio. Con medidas de protección como as xa adoptadas polo goberno local no barrio da Magdalena poñemos o noso patrimonio en valor e protexémolo para que as xeracións vindeiras recoñezan tamén a súa identidade.

Animamos polo tanto, aos nosos veciños para que aproveiten a oportunidade para achegarse, pasear, deterse nos edificios máis significativos como a fábrica de lapis ou a Igrexa do Socorro, e coñecer así, un pouco máis a súa cidade.