As XSG-Ferrol lamentan que o PP empregue argucias para impedir que o PSOE tramite a súa proposición sobre desafiuzamentos no Congreso

As Xuventudes Socialistas de Ferrol cualificaron hoxe de “malas artes parlamentarias” a decisión do PP de evitar que a proposición de lei sobre desafiuzamentos se vexa a semana entrante no Congreso.

O secretario xeral das XSG-Ferrol, Aitor Bouza, afirmou que “é unha burla ao Congreso que o Goberno diga agora que non estudou ben a proposición do PSOE sobre os desafiuzamentos, unha deslealdade institucional e unha falta de sensibilidade coa cidadanía”.

“É evidente – engadiu- que o PP e o Goberno prefiren aplicar o seu rodillo parlamenterio antes que solucionar os problemas da cidadanía, como é evidente que pretenden trasladar un debate, impedindo que se celebre a semana que vén, porque lles resulta incómodo e porque son incapaces de priorizar os intereses do país sobre os seus propios”.

Os mozos/as socialistas aseguraron que “a actitude do PP semente dúbidas sobre a súa intención de solucionar un problema do día a día, da España real, dado que prefiren darlle prioridade a un decreto que non soluciona nada, que dá titulares nas noticias durante dous días, pero non evita os desafiuzamentos, que é o verdadeiro problema”.

O secretario xeral das XSG-Ferrol concluíu que “está claro que o Goberno e o Partido Popular perderon as rendas do país, e só aspiran xa a evitar que as proposicións da oposición cheguen máis lonxe parlamentariamente evidenciando a falta de solucións de Rajoy e os seus ministros”.