XSG-Ferrol: “Rajoy e o PP deben entender que a lexislación non avanza a ritmo de catecismo, senón ao ritmo da sociedade española”

As Xuventudes Socialistas de Ferrol felicítanse pola sentenza do Tribunal Constitucional que considera acorde coa Carta Magna a reforma do Código Civil que regula o matrimonio entre persoas do mesmo sexo.

En opinión do secretario xeral das XSG-Ferrol, Aitor Bouza, “aínda que a tardanza no fallo é unha tacha institucional que non podemos valorar ben, a decisión adoptada demostra que o contido substancial e profundo da nosa regulación sobre o matrimonio ampara un concepto amplio, e non se reduce a vontade nin dunha parte da sociedade nin dunha crenza relixiosa concreta”.

Os mozos/as socialistas destacaron que “tanto o sentir da cidadanía como a lóxica democrática deixaron en evidencia a un Partido Popular que mantivo durante sete anos unha postura en aberta contradición coa maioría social deste país”.

O secretario xeral das XSG-Ferrol pediu “unha reflexión profunda ao Partido Popular, para que deixe de tentar impor ao conxunto da sociedade española unha visión da familia na que só se entende representada unha minoría”. “As leis do Estado- engadiron- non poden ser o reflexo dunhas crenzas particulares, senón que deben amparar un mínimo común que sexa representativo de toda a sociedade e o fallo do Tribunal Constitucional vén a ratificar esta postura”.

Dende a organización concluíron que “agora é o turno de Rajoy e do PP para que comecen a entender que a lexislación en dereito de cidadanía non avanza ao ritmo de catecismo, senón ao ritmo que quere a sociedade española, ao ritmo que regulou o Congreso dos Deputados en 2005 e que hoxe ratificou o Tribunal Constitucional”.